教育局局長孫明揚證實患上腎衰竭後，好多批評開佢嘅政黨同教育界人士都好有人情味，對佢暫時休戰停火。不過，一直強烈反對該局嘅殺校政策、甚至公開要求過孫公辭職嘅前天文台台長林超英，就喺網誌度引用唐代詩人韓愈嘅事迹，強調好官不管自身嘅際遇如何，都要以人民嘅利益為重，盡力而為，好似繼續曲線批評緊孫公。
林超英早前復活節假返咗家鄉潮州遊玩，到過韓文公祠參觀，並大受感動。佢話雖然韓愈管治潮州只有短短八個月，但卻贏得潮州人千多年嘅尊敬。佢最欣賞韓愈成立「州學」，幫助潮州人以教育脫離落後，仲捐出自己嘅俸祿資助學生膳食，為潮州建立起好學崇文嘅風氣。
林超英又話，韓愈係因為被貶官先至去咗潮州，但係佢豁達積極，冇因而感到沮喪，繼續盡心盡意為地方辦事，係所有為官者嘅學習榜樣，明顯係借古諷今，批評緊依家啲高官同教育政策。不過，睇番篇文章其實係喺上月廿六日寫落嘅，當時孫公病情仲未曝光，唔知佢知道對方身患重病後，會否暫時踩少兩腳呢？