政情：邱騰華「中伏」黑臉快閃

邱局長前日出席立法會環境事務委員會時，已被一個打着反核旗號嘅「五星戰隊」組織批評佢為「破壞環境局長」，好似卡通片內嘅怪獸襲地球，點知尋日出席大埔林村環保鄉村運動嘉許禮時，繼續被人寸爆。邱局長致詞時，一開始就大讚林村人傑地靈，又話新界人接近大自然，環保意識較城市人高，最難得嘅係，村民「重環境、重鄉情」，做起環保工作就事半功倍。

邱局長擦完一輪鞋後，開始入正題，佢強調鄉村係本港嘅「市肺」，如果村民「無分你我」做好環保工作，唔單止自己，成個社會都會受惠，仲話希望新界人將來喺環保議題上多多支持咁話。

將環保責任推畀新界人

表面上就叫新界人多多支持，但聽落好似講到啲新界人好唔環保咁，並將環保責任推畀新界人。作為鄉議局第二把交椅嘅張學明，就喺致詞時上演一場「新界環保犧牲之大控訴」，當場寸爆邱局長。

喺林村土生土長嘅學明話，林村受唔起「人傑地靈」四個字，最多都係山明水秀啫。跟住話鋒一轉，強調新界的確為香港環保事業貢獻良多，但就唔覺政府有相應回報，就以林村為例，為咗維護水質，好多村民擁有嘅土地都要被凍結，唔少人都對政府好多怨言，大家都希望邱局長唔好得個講字，到林村嘅污水排放系統做好之後，就畀村民起多啲樓，可以一圓成立小型屋苑嘅願望，唔使成日得個吉咁唔開心啦！

邱局長被學明當眾柴台，真係唧都笑唔出，影完大合照仲極速鬆人添！記者追問佢有冇回應學明嘅要求，點知佢黑面答咗句：「唔知！」然後匆匆上車離開。其實邱局長有啲記性或自知之明，好應該明白，近期無論堆填區或焚化爐，佢都係罔顧新界人利益，依家仲好意思將成個環保大業推波畀新界人，如果學明唔即時「回禮」，都對唔住新界人啦！