政情：新華網鬼祟出稿搞邊科

艾未未下落不明之後四日，新華社上周四凌晨十二點幾發出英文嘅新聞稿，新華網亦有發稿，指艾未未涉及經濟犯罪，但網上嘅新聞稿一出數分鐘後竟又隨即被刪去，冇人知發生咩事，看似神秘、又好鬼祟，其實係兒戲。

新華社同新華網今次出稿實在疑點重重。首先，佢哋作為內地官方媒體，點解處理艾未未呢個咁敏感嘅議題時，可以只發英文稿，而唔發中文稿？其次，點解新華網喺出稿冇耐又旋即將稿刪走？

立法會議員張文光認為，發英文稿明顯係有意將消息透過微博發出，目的係要消解以美國為首嘅國際壓力，但係篇稿喺發出之後又刪去，之後又冇晒下文，明顯係找不到艾未未嘅罪名，成件事簡直係笑死人。