政情：潘佩璆：龍年生B制唔過
內地孕婦來港產子不絕，明年仲撞正「龍年效應」，傳統上係生仔高峰期，本來已經壓力爆煲嘅公立醫院婦產科服務，勢必雪上加霜。立法會一個委員會尋日討論有關問題時，議員李華明就千叮萬囑政府，千祈唔好睇小「龍年效應」嘅威力，話每逢龍年都一定特別多人想生小朋友，仲自爆自己當年結婚後，都同太太等足三年，專登校啱喺龍年生「龍女」，對上一次龍年就多咗幾千個小朋友出世，希望當局唔好掉以輕心。
不過另一位議員潘佩璆就似乎對子女生肖無乜偏好，仲大唱反調呼籲市民唔好一窩蜂揀喺龍年生育，佢話如果同一年有特別多小朋友出世，即係意味個小朋友日後要同多啲人爭住入名校，畢咗業就要爭住搵工，成世人都同人爭崩頭，實在制唔過咁話。其實班議員講咗咁多，都係想政府未雨綢繆，明知出年一定會多ＢＢ出世，應該趁早做好準備，唔知班官員又收到幾多？