政情：醫委會補選方道生激戰陳以誠
專責監管醫生嘅醫務委員會正舉行一場補選激戰。話說沈祖堯教授自去年出任中文大學校長後，辭去嘅醫委會委員職位一直懸空，原來近日已醞釀緊爭奪戰。兩名候選人分別係親赴馬尼拉及時搶救Jason梁頌學嘅腦科專家方道生，另一位係香港醫學會副會長、私人執業嘅資深兒科醫生陳以誠，勢均力敵。
何栢良七難題考驗
由於呢個職位係由醫學界成員直選，所以兩人近日積極向同行拉票，但佢哋同時又要面對另一位醫委會委員何栢良嘅挑戰。何醫生向兩名候選人發出共七條難題嘅問卷，考吓兩人對醫委會個別議題嘅取態，例如醫委會係咪要主動調查醫院嘅醫療事故、醫委會應否設立新機制，畀海外醫生唔使考試就可以嚟香港行醫，以解決公立醫院醫生不足等難題。
何醫生坦言，今次係代表醫管局五千名公立醫院醫生「出題」，預計今日要交回嘅問卷結果，稍後將會公開。佢希望會員係呢個月尾投票前，可以清楚兩名候選人嘅諗法。兩位候選人分別喺公立醫院同私營醫療系統咁有地位，要二揀一真係唔容易。