政情：鄭汝樺獲鬆章唔識食胡

民主黨尋日喺立法會一個小組委員會提出動議，要求撤銷整條有關加車稅嘅收入保障令，最後喺建制派反對下被否決。不過咁唔代表建制派會無條件支持嚟緊嘅加車稅草案，佢哋達成共識，要求港府豁免三類車主毋須繳交新稅，包括環保車、舊車換新車、以及喺公布加稅前已落訂購買但未運到香港嘅新車，預計政府必須作出某種程度嘅讓步。

隨時引起更大爭議

不過有知情人士同我哋講，建制派提議嘅三大讓步好似好有道理，但執行起上嚟卻困難重重，一唔小心又會引起其他爭議。當中以豁免環保車交新稅嘅建議最易落實，甚至毋須修訂加車稅草案，只需要透過另一條決議案再擴大環保車享有嘅稅務優惠，喺一加一減下當冇加過稅就搞掂。

至於豁免喺宣布加稅前落訂嘅車主，其實早喺○三年對上一次加車稅時，當局已做過深入研究，最後都係解決唔到可能有人借虛假落訂日期逃稅嘅問題。當年嘅財政司司長係出名多橋、兼且鬧出過偷步買車避稅風波嘅梁錦松，連佢都諗唔掂，依家呢班庸官又點解決到呢？再者喺法律上，點樣先至叫做落咗訂呢？落一蚊訂算唔算？簽咗支票未過數又點計？個車主一向有信用，車行唔使佢預先畀現金落訂，唔通又要懲罰佢？真係令人諗爆頭。

有人就提議不如寧縱無枉，凡喺六月中草案通過前喺香港「落地」嘅新車都唔使交新稅，毋須計算落訂日期。但偏偏有啲名貴歐洲車輛，要訂成大半年先運到嚟香港。加上受到地震同核事故影響，唔少之前落咗訂的日本車至今都抵港無期，呢班準車主又點計先？

至於舊車新車一換一嘅建議就仲麻煩，係咪要攞咗架舊車去劏先至獲得豁免？運咗去外國或者泊喺車房等生銹又算唔算？阿Ａ將架舊車轉售咗畀阿Ｂ、阿Ｂ再即時劏咗佢架舊車，咁又係咪當一換一呢？再者根據現行嘅《汽車（首次登記稅）條例》，只要冇喺香港登記過嘅車輛都算係新車，包括由外國入口嘅二手車，佢哋又點計呢？呢個建議係咪咁有利環保，真係唔係咁簡單囉！