中環出更：Tim霍簽名 似足圖章
今時今日，寫得一手好字嘅人愈嚟愈少，尤其是毛筆字。尋日立法會議員霍震霆（Tim）出席一場書畫創作大賽得獎作品展覽時，卓妮問佢平時有冇練字或作畫嘅雅興，一向幽默嘅Tim霍諗咗幾秒，自嘲話：「你睇吓我簽名就知啦！」卓妮一時八卦，去嘉賓簽名冊睇吓呢位霍英東家族大少爺嘅簽名，又真係畀佢嚇咗一跳。
卓妮特登影低Tim少嘅珍貴簽名畀大家睇吓，事關呢個場合照計用毛筆簽名至係正路，不過睇嚟Tim少咁多年嚟都係一個簽名樣式走天下，所以留低咗一個形似圖章嘅簽名，望落同佢四平八穩嘅形象都幾相襯。不過，唔知呢幾個字係中文、英文定係罕見嘅中英文組合？佢聽罷笑稱，卓妮竟然笑佢？哈哈！
許曉暉教囡囡寫字
同場嘅民政事務局副局長許曉暉就真係好字之人，佢嘅簽名蒼勁之中帶些秀氣，冇經過一番苦練係冇可能寫得咁靚嘅。原來佢自細就同老師學字，雖然依家疏於練習，但就堅持教囡囡寫字，事關字就好似衣着咁重要㗎！
卓妮