中環出更：王賢訊結婚李文斌幫手上頭
仁濟總理王賢訊（Vincent）抱得美人歸，上周六晚喺洲際酒店筵開近六十圍，告別單身貴族生涯。Vincent結婚習俗做到足，搵嚟仁濟主席李文斌（Edmond）幫佢上頭，皆因對方係佢契妹夫，而Vincent就係Edmond夫婦媒人，兩家點只老友咁簡單。
Vincent結婚之喜，逾三十名王氏家族成員空群出動。堂兄弟王賢誌拍心口做晚宴司儀，Edmond就拉埋大哥李文俊、弟弟李文恩齊到賀。Vincent封咗Edmond做好命公，搵佢上頭，沾沾旺氣。Edmond就話，上頭儀式冇難度，照住張紙讀出吉利說話就得。
王忠秣開口恨抱孫
新郎心思十足，喺會場不停播放婚紗相Video。段片係兩人早前去台灣日月潭及上海影結婚相時影嘅，非常之煙韌。有相睇，現場仲有糖果任夾任食，一對新人好細心，安排專人手揸住即影即有相機，即場送番靚相畀賓客。
飲過新抱茶嘅老爺王忠秣，high到成晚笑唔停，更開到口話恨抱孫。問佢鼓勵囝囝生幾多個，王老爺答得鬼馬：「政府唔使縮班的話，生幾多個都得。」
卓妮