中環出更：麥拿侖超辣跑車 富二代先睹為快
叱咤賽車壇嘅英國賽車製造商麥拿侖（McLaren）推出「公路版F1」，早前喺將軍澳舉行新車展，招待VIP車迷，城中富二代爭相先睹為快。人潮中，見到合和集團太子爺胡文新（Thomas）及大生銀行家族後人馬清揚。睇見全新MP4-12C超級跑車，兩位公子即時被深深吸引，望到眼都唔眨。
胡文新馬清揚交流心得
時速可達三百二十二公里嘅MP4-12C首次登陸香港，吸引逾百位VIP聞風而至。Thomas收藏辣車無數，呢晚出現，唔通又有「新目標」?佢身邊係賽車經驗一流嘅馬清揚，兩位公子插住褲袋交流鍊車心得，甫士都型過人。講起車經，傾足大半粒鐘都唔捨得走。Thomas同馬清揚最後有冇心動，即刻落訂買番部MP4-12C就唔知嘞。
限量版跑車 雲維熹着迷
麥拿侖以製造F1一級方程式賽車聞名，呢趟出「公路版F1」，車迷恨到流晒口水。新車配有F1賽車等級裝備，首年全球產量約一千部，車價約三百九十萬港元。雖然價值不菲，但部車一面世就賣爆燈，想落柯打，要等到明年嘞。
嚟欣賞名車嘅，仲有香港汽車會會長兼前全國政協委員雲大棉公子雲維熹（Wesley）。佢對現場展出一部麥拿侖F1限量版跑車非常着迷，眼甘甘望到實。部車全港僅得三部，二手車價亦高達三千多萬港元。車界流傳，Thomas胡公子都有一部，係咪真，就要問過佢先知。Wesley就謙稱車價太貴，嚟睇吓已心滿意足，平日佢喜歡揸心愛法拉利及平治名車，飛馳公路上，一樣咁high。
卓妮