政情：黃進達「世襲」馬里名譽領事
大片江山由父傳子嘅故事歷久不衰，喺今時今日嘅香港，除咗家族生意有得由子嗣繼承之外，原來都仲有另類江山可以傳畀下一代嘅！講緊嘅係康泰旅行社董事長黃士心，佢啱啱卸下西非國家馬里共和國駐港名譽領事，接手嘅新名譽領事竟然係佢嘅大仔黃進達（Jason）。
爸爸公開盛讚工作表現
港府尋日刊登憲報，公布咗呢個咁得意嘅消息。公告共分兩則，一則公布中央政府已批准終止黃士心出任馬里共和國駐港名譽領事，另一則就指中央已正式承認Jason擔任該名銜，呢個現代版嘅世襲故事就咁順利完成。
現任康泰董事總經理嘅Jason，正式上任未夠一年，但已經歷菲律賓人質事件、日本大地震等突發事件嘅考驗，爸爸黃士心都公開盛讚佢做得唔錯。睇嚟處於半退休狀態嘅黃士心，唔止部署交盤生意畀囝囝咁簡單喎。