政情：袋巾傑掛住唱歌懶理煙民
預算案建議大幅增加煙稅，搞到煙民群情洶湧，仲將支持加稅嘅公民黨黨魁梁家傑（袋巾傑）當做頭號敵人，甚至成立聯盟要佢「稅債票還」。不過，袋巾傑火燒眼眉當冇件事，事關尋日朝早有煙民去立法會狙擊佢時，佢仲施施然返去黨總部公布五周年黨慶細節，仲計劃喺下周六黨慶時獻唱籌款，仲要賣關子唔肯講唱乜嘢歌，完全冇被煙稅狙擊而影響到心情。
擺22圍籌款
袋巾傑話，今次係第一次搞黨慶晚會，所以擺二十二圍賀一賀，為咗體現該黨一向支持環保嘅理念，仲特登揀咗「港飲港食」呢個題材，即係除咗食米之外，成個餐單都係用本地食材製成，實行叫大家一齊體驗低碳飲食。
正如之前提及，袋巾傑會獻唱籌款，書畫家林逸之亦捐出兩幅作品拍賣籌款，當代書法家游尚澤亦送出三幅字畫做賀禮，唔知會畀邊個有心人買走呢？