中環出更：王賢訊雙喜臨門
仁濟醫院新一屆董事局尋日舉行交接就職典禮及晚宴，新任主席李文斌正式由董吳玲玲手中接過火棒，前來祝賀嘅政商賓客將現場逼得水洩不通。李文斌嘅爸爸理文造紙主席李運強率領全家齊打氣，陣容最龐大。不過，要數全場喜氣指數爆燈王，非今日做「老襯」嘅總理王賢訊（Vincent）莫屬喇！
Vincent尋日冧莊做總理，今日就喺洲際酒店筵開六十席，迎娶女友Vincci，難怪尋日恭喜佢嘅聲音不斷。同時冧莊做仁濟總理嘅馮卓能及周松東，係Vincent嘅兄弟團成員。
幾位後生仔一齊做善事，又可以見證兄弟人生最重要嘅階段，呢份情誼認真有錢都買唔到，十分難得。
Vincent係王氏國際集團主席王忠秣嘅愛兒，依家喺王氏電子出任產品發展部經理。記得年初Vincent曾經話過，結婚係今年首要任務，其他嘢要暫時放埋一邊。
李文斌接棒 大計多多
尋日卓妮追問佢婚後諗住去邊度蜜月，點知佢話多數唔去喇，事關爸爸投訴佢掛住籌備婚禮成日唔返工，所以佢婚後要勤力返工補番數喎！
李文斌新人新氣象，甫接棒就宣布多項大計，包括成立支援嚴重傷殘人士嘅「仁濟傳心傳義基金」，又宣布率先捐出一千萬元做首筆援助經費。李太何芷韻（Amanda）尋日都滿場飛招呼賓客。佢笑稱，會專心湊好一對子女，少啲駁嘴，以示對老公瞓身做慈善嘅支持。
卓妮