政情：林建康復活節遊杜拜
近排天災人禍特別多，令到好多人冇晒出遊嘅興致。不過家庭事業樣樣稱心如意嘅愛沙尼亞駐港名譽領事林建康（Matthew），一啲都唔受影響，佢哋一家四口將按照原定計劃於復活節暢遊中東六日，除咗享受杜拜嘅陽光與海灘，仲會去阿布扎比新落成嘅全球最大室內主題樂園「法拉利世界」玩餐飽！
日前喺馬場見到Matthew同埋太太黃寧豔，斯文嘅林太着咗佢至愛嘅Chanel連身裙同埋短身外套，手挽Hermes靚袋，形象輕鬆大方。講起復活節假期，Matthew話佢哋去年已經去過中東，由於兩個仔好鍾意，所以一早已計劃復活節再去玩過。
近年中東時不時有驚世之作，「法拉利世界」去年下半年落成，樂園成個外觀十足一架法拉利跑車，最大賣點係全球最高速、時速高達二百四十公里嘅過山車，畀遊客體驗揸F1賽車嘅快感。咁Matthew實玩得好癲嘞！估唔到林太踢爆話，老公玩完過山車就會唔舒服，所以多數唔會去試啦！好彩樂園有機場客運大樓咁大，仲有大把嘢玩。