政情：舖租狂升鄧鉅明牙痛咁聲
本港店舖租金一向貴冠全球，近排租金愈升愈有，升幅仲好誇張咁三級跳，搞到一邊投資舖位一邊做鐘錶生意嘅太子珠寶老細鄧鉅明（Jimmy）都有啲恐懼症。佢話，最近舖租市場好混亂，有啲靚舖被跨國集團以三倍價錢搶租，難怪佢擔心零售業遲早面臨一場淘汰戰。
Jimmy話，近排市場最混亂嘅係銅鑼灣區，有個靚舖被跨國鐘錶品牌租下，租金狂升三倍，完全脫離現實。租客嘅目的係作為旗艦店，以便長遠建立喺內地客心目中嘅品牌形象，所以不計成本。
跨國公司財力雄厚，唔需要計較單一店舖自負盈虧，難免出手闊綽，佢擔心本地鐘錶行業冇本事同佢哋搶靚舖，未來競爭將愈嚟愈大。
Jimmy又話佢哋嘅客仔有九成來自內地，所以佢除咗繼續喺遊客聚集嘅銅鑼灣、尖沙咀一帶搵靚舖之外，亦正密謀進軍內地開店，預計上海、廣州第一間舖將於下半年開業，到時佢就唔使同人搶租搶到牙痛咁聲啦！