政情:立會修例保主席「紅牌」

議員喺議會內搞事,可以透過收緊《議事規則》趕佢哋離開會議廳,至於其他人想喺立法會搞事,就要出動《立法會(權力及特權)條例》嚟對付。立法會今年就會搬家,為咗確保立法會主席去到新大樓之後,繼續有權出「紅牌」趕滋事者出場,立法會秘書處尋日決定修改有關嘅指令。

新嘅指令包括新大樓成幢樓,無論係會議廳,抑或前廳、後廳同花園都包括在內,換言之將來立法會開緊會嘅時候,而示威人士喺新大樓出面嘅立法會廣場嘈喧巴閉,主席如果覺得唔滿意,照樣有權出「紅牌」趕佢哋走,秘書處仲打算新嘅指令會喺今年九月新大樓啟用之前就實施適用。

其實更重要嘅係,法例賦予立法會議員特權,喺佢哋往返立法會開會途中,可以免被逮捕,議員發言受到保障,唔會因為佢哋嘅發言而被控誹謗。

話時話,秘書處喺修改指令嘅文件入面,唔覺意透露咗新大樓將會喺五月十七日星期二完工,而呢一日又剛好係立法會主席嘅生日,會唔會巧合咗啲呀?

Money18免費即秒股票報價網站現推出8升級功能,財經資訊,實時實發!