政情：蔡冠深總動員睇卡通行善
中華總商會一眾高層尋晚空群而出獻愛心，趁四月四日兒童節舉行慈善首映禮，欣賞一齣卡通電影。城中名人都掏腰包現身支持，中總會長蔡冠深同太太蔡關穎琴動員四名子女撐場，陣容最龐大。
中總喺兩年前成立中總愛心行動關注弱勢社群，尋晚佢哋特登舉辦慈善首映，以籌募愛心經費，同時招待一千三百名匱乏家庭及兒童齊欣賞，為佢哋送上溫馨同埋歡樂。
蔡會長一家六口總動員，除咗喺外國讀書嘅大仔之外，一女三仔到齊晒。問蔡太送咩禮物畀小朋友做兒童節禮物，佢笑稱，全家人喺埋一齊就係最好嘅禮物。
記得蔡太曾經自爆平時嚴格限制子女嘅使費，連手機都係用爸媽唔用嘅二手貨，所以子女曾經被同學取笑係「最窮嘅有錢人」，蔡太真係用心良苦嘞！
方文雄豪捐十萬做善事
中總副會長方文雄尋晚都喺度，佢話已經好耐唔睇戲，卡通片就更加唔使講。不過佢尋晚豪捐十萬蚊，又買咗十幾張戲飛請朋友入場，又有卡通片睇又做善事，一舉幾得。