政情：任亮憲甘做「背後男」
「維園阿哥」任亮憲都可算係上年政壇嘅風雲人物，佢成功「活化」港台老牌節目《城市論壇》，吸納大批「粉絲」，喺社民連創黨主席黃毓民力捧下，旋即成為黨內新星，不但自薦參與去年嘅南區區議會補選及今年尾嘅區選，更喺黨內牽頭倒閣，要將黨主席陶君行拉倒。不過，升得快、跌得快，自任亮憲喺去年年尾捲入強姦及非禮案後，過去喺公開場合受盡歡迎嘅佢，人氣已大不如前。日前佢出席人民力量嘅起動大會時，更表明心迹，話自己已無意出選區會，仲話喺背後為人打氣更適合佢喎。
任亮憲喺《城市論壇》跑出後，即時畀社民連招攬入黨，喺佢爸爸前立法局議員任善寧嘅世交毓民「關照」下，政途更一帆風順。雖然最後喺缺乏黨支持下，佢未能代表泛民，出選去年尾嘅南區區議會補選，但佢早已明言唔會就此停步，更向傳媒放風有意挑戰今年區選，仲話對九龍西、亦即係毓民嘅選區特別感興趣。悉日嘅佢更鋒芒畢露，曾畀黨友揶揄「沒有鏡頭，那會蒲頭」，當時冇人會諗到一單接一單嘅桃色醜聞會將佢嘅政治前途斷送。
棄守發迹地《城市論壇》
自捲入醜聞後，任亮憲已鮮有露面，只係偶爾出席人民力量嘅公開活動，但每次出現，仍然成為傳媒嘅追訪目標。日前佢出席該黨起動大會，被記者問及其參選意向時，雖然表明自己尚未決定，但卻坦言傾向做後台工作多啲，仲話人人有不同角色，與佢昔日嘅論調、態度大相逕庭。佢仲自爆，會努力做好助選工作，特別係幫佢好友「滷味男」錢偉洛手，狙擊民協。
「維園阿哥」棄守佢嘅發迹地《城市論壇》，該節目已成為各黨各派青年團嘅基地，唔少人都想知佢幾時會「強勢回歸」。不過任亮憲似乎對城論唔係太眷戀，佢只係話現時各政黨百家齊放，氣氛唔錯，直言有新氣象係好事，話自己適當嘅時候自會返去。有支持者主動向佢提起單桃色醜聞，佢就好「禪」咁回應：「凡事總會過去。」
任亮憲曾經斷言要喺區選跑出，如今喺時移勢易下卻無可奈何咁反口話，喜歡做「背後的男人」為人助選多啲，都咪話唔唏噓。不過，政治一日都嫌長，佢大把青春，即使今屆唔玩，都唔代表佢下屆冇得成功翻身。