中環出更：陳美齡留守日本胞弟運物資接濟
日本核危機陰霾不散，除災區外，東京等大城市仍出現物資短缺，缺水缺電時有發生。早年移居日本發展嘅著名歌星陳美齡卻堅持與日本共患難，身為培力藥業集團主席嘅弟弟陳宇齡（Abraham），屢次勸佢回港不果，惟有定期運送物資「接濟」家姐。Abraham將多箱蒸餾水、餅乾及電池寄出，塞滿一個大貨櫃。
東華尋日舉行新任董事局就職禮，梁定宇（Billy）正式卸任，將主席寶座交畀張佐華；陳文綺慧就榮升第一副主席，老公Abraham與九十歲外母齊現身打氣。
講起家姐仍在日本工作，Abraham話心情忐忑，每天致電慰問對方，最憂心嘅係東京仍出現間歇性停電，部分人唔敢飲用自來水，改以蒸餾水煮飯，故當局限制每人每日只可購買兩小樽蒸餾水，Abraham擔心家姐一家大細唔夠水飲，不停寄水畀佢，又送上大量電池，等家姐停電時有電筒用，認真周到。
梁定宇李鋈麟避去日本
東京依然立立亂，Billy本來計劃落莊之後去踩單車，機票都訂埋，見勢色唔對，急急退票改去台灣玩，明天起程，之後再陪太太及囝囝遊新加坡充電，過番啲悠閒生活。
拒絕遊日嘅，仲有東華總理李鋈麟，佢打算四月去大阪考察彈珠機生意。鋈麟話，內地人愈來愈喜歡玩彈珠機，市場潛力大。佢與一班內地大老闆，想話引入日本彈珠機，發揚光大，點知核洩漏事故後，大家提起去日本都驚喎。
東華就職禮上，仁濟候任主席李文斌夫婦、保良候任主席龐盧淑燕都嚟湊熱鬧。李文斌話，日本地震後翌日，第一時間為一對龍鳳胎掃日本尿片。佢家中亦收藏唔少日本鮑魚，至少有十斤，仲有日本和牛，食晒手上存貨後，就暫時唔入貨，怕受輻射污染。
卓妮