或者大家會聽過支聯會主席李卓人係「富三代」，但佢喺家鄉潮州有祖業就未必咁多人知道。阿人尋日出席電台節目訪問時自爆，爸爸稱得上係二世祖，因為爺爺嗰代已經「好富貴」，喺汕頭有唔少物業收租，祖家更加大到有網球場，過住地主生活，到佢呢代仍擁有百分之一嘅潮州祖業股權，可惜一直未有機會返去睇吓。
阿人話自己喺上海出生，一九五九年先至舉家來港，不過當時已經無乜錢，一切要從頭開始。所以阿人呢個「富三代」只係得個名，應該係「富不過三代」至真，難怪阿人笑稱，如果爺爺當年識得帶筆資金來香港投資地產，咁佢就「唔得了」啦！
現時阿人同民主政治不可分割，源於大學時代睇過一本叫《青春之歌》嘅書，令佢受啟蒙，對政治產生興趣。不過，阿人嘅媽媽就唔係咁睇嘞，佢媽媽一直認為，有一年阿人肝炎入院兩個幾星期後才「變天」，踏上政治之途，只係阿人仔大仔世界，做媽媽唔鍾意嘅都無符。