政情：林D9為份糧反寸長毛
被喻為「人肉錄音機」嘅政制及內地事務局局長林瑞麟（林D9），雖然向來係議員嘅批評對象，但佢亦非省油燈。社民連梁國雄（長毛）尋日喺立法會財委員特別會議上，話坊間唔少MP3機都減咗價，林D9呢部人肉錄音機都應該減價，即係叫林D9減人工。林D9就反寸長毛，話如果長毛覺得一部MP3機就答到佢問題，未免太睇小自己喇！
長毛失守後，輪到民主黨李永達（高達）接力質詢林D9，問點解要留定筆錢請政治助理？林D9回應話，今屆政府得番十幾個月任期，搵到人選嘅機會愈來愈低，即係暗示未必請到人，高達自然無說話好講。
另外，經常求見官員不遂嘅「五散人」林大輝，就追問駐粵辦主任鄭偉源係咪人手唔夠，否則點解由○二年駐粵辦開張至今，都無人肯見佢，想反映內地港商苦況都無機會。點知鄭偉源相當好記性，諗起以前同大輝喺福建見過面，但已經係九八年嘅事，真係令人唔知好嬲定好笑。