政情：張宇人撐日本菜無害
日本大地震，唔少市民擔心日本食品受輻射污染，令本港日本餐廳嘅生意大跌。立法會飲食界代表張宇人（Tommy）尋日講起日本食肆就皺晒眉嘆晒氣，事到如今佢只能坦言，坊間好多日本餐廳嘅食材其實都唔係直接由日本入貨，加上日本政府把關甚嚴，相信食日本菜都唔會有問題，曲線狂撐飲食業。
Tommy話知道好多人誤以為全部日本餐廳嘅食材都係來自日本，尤其係魚生，所以近呢個星期對日本菜望而卻步，但實情係日本魚生原本都唔夠日本人食，當地人都係遠洋捕魚再喺日本批發出售，所以就算福島附近海域受輻射污染都唔會有好大影響。不過Tommy承認，因為日本係主要嘅魚生批發地，經大地震洗禮後批發及運輸都未回復，相信本港嘅魚生供應短時間內都好緊張，價格亦會隨之上升。
以前淡水魚被驗出孔雀石綠，Tommy為表唔係每種魚都有問題，專登組團食魚狂撐，但佢話今次就唔會周圍同人講，話「我日日都食日本菜」嚟令市民安心，相信市民眼睛雪亮，明白食乜係安全喎！