政情：傻強如夢初醒吹雞護航
財爺鬍鬚曾發表「史上最廢」預算案後，民怨沖天，雖然最後跪低以派錢暫時平息憲制危機，但預算案中提到加煙稅及汽車首次登記稅嘅措施，社會亦暗潮洶湧。臨時撥款草案一役被泛民主派成功「突襲」嘅財經事務及庫務局局長陳家強（傻強），曾被議員揶揄佢「如在夢中」，如今佢終於瞓醒，面對煙稅及車稅兩個炸彈，即時「冧友」打鑼搵佢班建制派老友加入兩個負責審議加稅命令嘅小組委員會，以防再畀泛民跣多一鑊！
由於加稅須修改法例，所以立法會早前已成立兩個小組審議相關事項。雖然小組仲未開波，但單睇佢哋嘅臨時成員名單已見端倪。向來關注私煙問題嘅民主黨涂謹申、衞生服務界李國麟及為煙民爭取權益嘅梁國雄及陳偉業等，加入煙稅小組並無驚喜。專注環保範疇嘅公民黨陳淑莊同民主黨甘乃威以及航運交通界嘅自由黨劉健儀，加入審議汽車稅亦無異樣，但最弔詭嘅係，向來對呢兩個稅都冇乜表過態嘅會計界陳健波同中總代表黃宜弘，竟然自動請纓加入車稅嘅小組委員會，真係令人跌到一地眼鏡碎。
建制派踢爆曾被「提醒」
兩個小組喺尋晚凌晨十二時截止報名，但據講排隊加入嘅建制派議員陸續有來。有建制派議員私下向我哋承認，係傻強「提醒」佢加入相關小組，以防泛民喺現階段搞小動作，可見傻強經臨時撥款一役已學識「箍票」嘅重要性。政界中人分析，議員難捨道德高地，故推翻加煙稅嘅機會將微乎其微，但由於港府聲稱加車稅可減少道路擠塞嘅理據實在太牽強，預計港府喺議員圍攻下最終亦難免要讓步。
另外，專業會議四名議員早前亦約咗煲呔曾見面，再度促請港府復建居屋。煲呔曾出名患有嚴重「八萬五恐懼症」，向來一聞「居屋」二字，輕則色變，重則拍枱黑面，但專業會議有成員就透露，煲呔曾今勻對復建居屋嘅態度軟晒，仲話會認真考慮，預計今年嘅施政報告將有新猷。呢個弱勢政府成日逆民意而行，睇嚟經預算案急轉彎後，港府未來都要喺車稅同復建居屋等議題上「再跪一次」啦！