中環出更：故友重逢高錕認得陳祖澤

七位傑出人士尋日齊獲港大頒授榮銜，除高錕及陳祖澤外，仲有公開大學校長梁智仁、貿發局主席蘇澤光（Jack）、大慈善家田家炳及富聯國際集團主席鄭維志等。

高太護夫禁閃光燈

久違了嘅高錕留咗長長白鬚，睇落去肥咗五、六磅，發福不少，由太太黃美芸陪同下到來，而佢嘅子女身在加州嚟唔到，但亦有唔少親友到賀，仲攞埋相機來要求同高錕夫婦合照。不過，高太怕老公對閃燈過敏，不厭其煩話：「No Flash！（不要用閃燈）」。

高錕（前排左一）在台上同陳祖澤（前排左二）有眼神交流，老友程度不言而喻。

田家炳（右二）與三名孫兒齊分享獲頒榮銜喜悅。

港大校長徐立之作出特別安排，讓高錕先上台領獎，仲陪佢去「扑頭」。高錕表現淡定，重遇老朋友阿John，更主動送上微笑。阿John開心過中獎，佢同卓妮講，當年做緊教育統籌司時，高錕就係中大校長，彼此常交流教育心得，老友到極。阿John尋日重返母校攞名譽博士銜頭，心情特別興奮。

醫管局主席胡定旭（左）與前東華三院主席馬清鏗（右）嚟撐老友蘇澤光。	去年獲頒名譽院士嘅「三嫂」袁蘇妹（左）專登嚟恭賀陳祖澤夫婦（中及右）。（楊歡成攝）	梁智仁（中）獲頒榮銜，太太（左）同大仔梁捷文話要開P慶祝。

同場獲頒榮銜嘅梁智仁亦獲家人撐場，大仔梁捷文話，稍後會為爸爸開Party慶祝。捷文並冇繼承爸爸衣鉢做醫生，反而選擇任職名牌廣告公司做策劃，佢話多得爸爸思想開明，冇逼佢做醫生喎。

捐身家辦教育嘅田家炳，獲頒榮銜實至名歸，連梁智仁太太都專程上前恭賀，話佩服田生夠偉大喎。田氏家族人強馬壯，子女、新抱及孫兒到齊晒，有成十人咁多，夠晒大陣仗。

Jack蘇都唔執輸，有太太、千金及女婿嚟打氣。卓妮見到Jack蘇囡囡腹大便便，順便恭喜佢就快榮升做外公，可謂雙喜臨門嘞。