特區政府高官講嘢，老朽留意有兩個特點：一是講過唔算數，腦殘兼失憶；二是隨口噏當秘笈。前者好似中央政策組首席顧問劉兆佳，明明講過香港民怨已達臨界點，其後又否認，虧他是「首席顧問」，卻腦退化成咁！內地有一說法：一個男人連房子都沒有，他就不是一個男人。引而伸之：一個高官連剛說過的話都不敢認，他就不配做高官。所以，劉兆佳應下台，回復平民身份，講乜都冇人啄你。
後者當以唐唐為佼佼者，佢最近喺《香港家書》論時事，又開口夾着脷，話香港出現「急性盲搶鹽」嘅國際笑話，係網民造謠生事。阿哥，呢啲咁無知嘅信口開河，只適宜在自家官邸品嘗紅酒，向老婆或僕人大發謬論，如今公然矛頭直指網民造謠，身為網民一分子，明明喺網上狠批啲師奶阿叔無知，今竟被屈造謠生事，呢隻死貓，點啃？
再講，早排唐唐唔知食錯乜嘢，狂躁亂向「八十後」開炮，又「剛愎自用」又「車毀人亡」，搞到自己民望插水。最近佢藉公開講嘢，立刻以重拳打倒昨日的我，狂擦「『八十後』對社會好重要」，又話「政府有責任聆聽年輕人嘅訴求，滿足新一代嘅需要」云云。
有人批評中國各個階層都缺乏對自己身份的自覺，尤其不知道對自己的職業而言，體面意味着甚麼。唐唐身為政務司司長，更是下屆特首熱門人選，說話即使沒智慧，可也要對自己的言行負責，總不能常閂埋門品紅酒，與民情脫節，條條fing的胡扯些令人發火的謬論。司長，不要攪亂自己身份。