政情：IT豪退出競爭法草委
被喻為「商界廿三條」嘅《競爭法》正進行逐條審議階段，不過由於一班對條例草案有保留嘅議員不斷拉布，令草案審議極為緩慢。資訊科技界議員譚偉豪（IT豪）唔知係咪頂唔順冗長又無新意嘅會議，以「公務繁忙」為由退出草案委員會，成為該委員會繼人民力量陳偉業同專業會議梁美芬後嘅第三位逃兵。
IT豪直言，當初佢決定加入《競爭法》草委會，無非係想反映業界意見，佢相信經過連串會議後，法例已可合理過渡，而再開落去，會議內容亦只會不斷重複，所以先決定退出，冀放多啲時間搞創新科技。佢仲笑言，佢班五散人兄弟好多仍然喺委員會入面，他日亦可透過佢哋反映意見喎。
無獨有偶，金融服務界詹培忠早前亦退出同樣惹火嘅《公司法》草案委員會。詹Sir話參與咗多個委員會，分身不暇，仲話《公司法》草委會嘅會議全部排喺朝早八點半，咁早起床實在艱難，笑言雷曼小組會議嘅九點半會已係極限。