政情：Rita劉告五日假做手術
商務及經濟發展局局長劉吳惠蘭（Rita）上周五突然告病假，正式病假由尋日起休假到本周五。Rita喺休假期間要接受手術，知情人士話以佢告病假五日推算，應該唔係患咗好嚴重嘅病喎。Rita話多謝大家關心同問候，不過就以私隱為由，唔想進一步透露病情。
局長病咗，副局長當然要頂上，喺尋日嘅財委會特別會議上，有兩個環節一共兩個半小時，本來由Rita統領多個部門出席回答議員嘅質詢，就改由副局長蘇錦樑（Greg）臨時頂上。Greg首先讀出基於時間關係已經準備好嘅開場白，然後就將議員嘅提問，一一分派畀其他公務員同事作答，例如當有議員問到科研問題，Greg就叫創新科技署同事回答，問到港台問題時，就叫廣播處長答，總之樣樣都好似唔關佢事。
Greg喺處理競爭法草案嘅問題上，畀議員批評得體無完膚，佢嘅民建聯舊黨友仲一語中的，話呢個政府有好嘢都唔會留番畀佢，尋日本來有機會發揮，但可能呢個機會來得太突然，又發揮唔到。