政情：公僕紀念金針氧化變色
金價不斷飆升，令政府送贈公僕嘅紀念金針開支都大增，每個紀念金針成本由一千七百多元增至二千多元。大家咪以為個金針真係以四條九足金製造，其實只係Ｋ金，每枚金針嘅含金量只有三點八克，所以擺擺吓隨時氧化變色，搞到呢份紀念變得好脆弱。
服務政府四十年嘅公務員工會聯合會主席梁籌庭，十年前獲頒發「服務30優良」紀念金針，佢話將金針一直放喺櫃桶內，近期攞出嚟一睇，發現已氧化成紅色，令佢甚為氣結話：「政府邊會咁好畀足金你吖，打鑊『甘』就有！」
媽打懶理真金定Ｋ金
民政事務局前任常秘李麗娟（媽打）亦喺○一年獲頒金針，放喺保險箱內珍藏。媽打話，佢未有理會個金針係真金還是Ｋ金，只覺得有紀念價值，亦係港府對資深公務員嘅小小心意喎。同獲金針嘅仲有教育局局長孫明揚，孫太鍾小芬話，佢老公十幾年前已攞到手，佢拿上手一睇，雖然感覺輕巧，但物輕情意重喎。