政情：醫生叫周一鑊早抖下台
公立醫院內科醫生逃亡潮觸發嘅前線醫生怒火一發不可收拾，醫管局同工會上周五已達成協議，而醫管局亦會喺下月中就最大爭議嘅醫生晉升制度同通宵當值津貼問題諮詢全體醫生，令兩大工會同意暫時按兵不動。不過，食物及衞生局局長周一嶽喺上周六臭口出狂言，暗批啲醫生「斤斤計較」，講到醫生好似見錢開眼咁，言論再挑起一眾醫生怒火，火燒周一鑊。
咪睇班公立醫生得把口，佢哋呢兩日不斷喺社交網站facebook嘅「關注內科醫生人手問題群組」留言，狂插周一鑊抹黑醫生。有醫生覺得醫管局擺明採取「拖字訣」，加埋周一鑊口出狂言，同管理層已無互信可言，要求工會即時發動靜坐。有人就上載多張「惡搞」周一鑊嘅海報，要求佢公開道歉（見圖），甚至叫佢早抖下台：「周局長，你累了，請你下台回家睡！」
擬登廣告聲討醫管局
有人就擺明車馬話要同周一鑊「斤斤計較」，因為大家不忍門診醫生只得三分鐘去睇有十三種長期疾病嘅病人，又或是醫生兩小時內要巡廿九個病人。有人建議將海報張貼喺醫院，等市民知道前線醫生有幾苦，更有人話要喺報紙登廣告聲討醫管局同周一鑊。聽到上述嘅言論，反映醫生群情洶湧，水滾到沸點，更好似一個快將爆炸嘅炸彈，一爆不可收拾。
公共醫療醫生協會見群情洶湧，尋日發聲明呼籲同僚冷靜，以免畀人指摘前線醫生破壞協議在先。會長蘇潔瑩不諱言周一鑊明顯辣㷫同事，大家反應咁激係可以理解嘅，重申協會從來冇排除作進一步行動，但暫時未收到前線同事正式提出相關要求。
前線醫生聯盟主席謝耀昌就話，今日會搵埋醫學界立法會議員梁家騮開會，傾下嚟緊有乜可以做，可能會要求醫管局提前諮詢，亦會研究點樣收集前線意見，睇下大家傾向繼續談判定係將行動升級。周一鑊今次咁樣倒自己米，真係自作孽不可活，醫管局亦多得佢唔少，不過，最終受害嘅都係病人同普羅市民。