中環出更：羅啟妍鴛鴦Look襯宋朝古玉
近年逐漸淡出市場拓展工作嘅國際著名珠寶設計師羅啟妍，全情投入文化藝術及慈善活動後，更顯從容自在。卓妮日前喺一個酒會上遇到羅啟妍，見佢由耳環、長褲到鞋襪，全部都唔對稱，不按牌理出牌嘅隨意打扮，盡顯設計大師嘅獨特品味。
衣着玩另類平衡
羅啟妍笑稱，佢作鴛鴦打扮嘅靈感起源於珠寶設計，由於佢收藏嘅玉石珠寶古董好難搵到成雙成對，所以就要喺唔平衡之中尋求平衡，順理成章成為佢好重要嘅設計意念，後來連自己嘅衣着打扮都大玩另類平衡，崇尚鴛鴦打扮十多年。
羅啟妍順手指住自己戴緊嘅一條玉石頸鏈，其中一塊方形深啡色宋朝古玉係靈魂所在，而一身鴛鴦打扮嘅意念源頭正來自頸鏈。耳環及鞋襪唔同色、唔同款就好易辦，但條鴛鴦顏色嘅長褲去邊度買呢？唔使問，梗係佢自己設計兼訂造啦！