中環出更：李美辰餵母乳無懼奶粉荒
日本爆發核輻射恐慌，搞到食開日本奶粉嘅ＢＢ面臨缺糧危機，為人父母都好擔心。
彭芷君囝囝飲豆奶羊奶
不過，餵開人奶嘅媽咪就唔使擔心無奶粉餵BB嘞，好似和富社企主席李宗德大女李美辰，佢話一直有為未斷奶嘅細女餵食母乳，所以唔使周圍去搶購奶粉，亦唔怕奶粉受輻射感染，仲可以透過親密接觸增進兩母女感情添！美辰話，佢好珍惜每晚三次嘅「親子」時間，就算要佢瞓少啲都係值得。
至於同樣以母乳育兒嘅香港青年聯會司庫彭芷君（Gigi），佢嘅四歲半大仔及二十個月大嘅細仔都係餵人奶大，直至斷奶後改飲容易買到嘅奶類製品，好似大仔飲豆奶，細仔就飲羊奶，飲到兩個皮膚都好靚，身體仲好健康添！
Gigi近期為咗青聯嘅工作相當繁忙，但佢兩個寶貝仔就好支持媽咪，仲讚媽咪係佢哋嘅天使，大家係咪覺得ＢＢ首六個月嘅母乳哺育真係好有效呢？