中環出更：張華峰新潟置業幸未扑錘
日本核輻射危機波及多款農產品，東北部多個縣市嘅食物及自來水被驗出受污染，當地居民要被迫撤離。
卓妮八到，全國政協委員張華峰早前同太太去過日本旅遊，經福島前往新潟縣，探望中國駐新潟縣總領事王華，佢哋仲一度想喺日本新潟縣置業，幸好最後未有扑錘，諗起都捏一把冷汗。
張華峰日前現身跑馬地馬場，講起日本遭遇地震浩劫，亦感同身受。佢話當時新潟未經歷地震，陡峭山巒連綿，風光如畫。佢憶述，當日由東京坐個多小時火車抵達新潟，王華熱情招待，宴請佢哋品嘗新鮮海產及天婦羅。愛吃嘅張華峰盡情歎三文魚刺身、吞拿魚腩、海蝦及深水海產，啖啖鮮味。肥沃嘅新潟平原亦盛產大米，飯味特別香甜，令張華峰夫婦胃口大開。
睇中山上獨立屋
歎完日本菜後，張華峰又參觀當地豪宅，其中一幢位於山上嘅獨立屋，面積達四千呎，仲有二千呎花園。建築師講求環保，喺屋頂安裝太陽能板，供應全屋電力，夠晒慳電，豪宅售價九百多萬港元，近年吸引唔少中國人投資，事關由上海坐飛機去新潟縣，只需兩小時，揀番一幢做度假屋認真一流。
加上豪宅景觀又夠正，張華峰一度心郁郁想買番間，最後決定返香港諗真啲先，依家諗番轉頭，都算執身彩。雖然買唔成屋，但張華峰同王華成為好友，九級地震後，馬上致電對方，可惜冇人接聽，翌日多番再試，終於打通，得悉王華平安無事，仲幫手協助疏散當地居民，才鬆一口氣。
翻睇當日遊新潟縣嘅舊照，張華峰話百感交集，希望日本當局盡快展開災後重建喎。
卓妮