如果以前有人同你講，小心死人冧樓呀，你嘅反應可能係話，啋！乜得你講嘢咁鬼死陰毒㗎！之但係經過土瓜灣馬頭圍道冧樓事件之後，對於叫你小心嘅仁兄仁姐應該會改觀嘞，反而慶幸有個咁關心你嘅朋友。好嘞，假如有人同你講，小心死人冧橋呀，你又會有乜嘢感想呢？
大家應該記得本報上月十九日揭發東區走廊橋躉移位，嚇到全人類鼻哥窿冇肉，唯一嘅例外係路政署，當時署長劉家強好淡定咁話，事發前已規定每日進行兩次勘察工程，事發後已加強至每小時一次，確保橋躉穩定。你咪理劉署長真係淡定抑或扮晒叉燒，起碼表面上係泰山崩於前而色不變。當然你都可以咁樣理解，但凡叫阿強都係「傻強」，傻嘅梗係唔識驚啦！
一波未平一波又起，繼東區走廊橋躉移位之後，本報再踢爆另一條橋甩皮甩骨。沙田石門交匯處有一條接連沙田同馬鞍山嘅天橋，落成只不過二十年咁大把，已經出現多處危危乎現象，包括石屎剝落、鋼筋外露、石壆有罅以及橋躉泥土幾近流失等等。最恐怖嘅係橋底地面出現一個大窿，足足可以容納一個人出入。
莫講話街坊街里見到危橋心慌慌，記者邀請註冊專業工程師彭振聲去現場視察過，連專家都話有問題。彭振聲認為情況「絕對不可接受」，估計係地面排水渠有裂縫導致滲水入地，沖走地下泥沙，又或者受到城門河潮水漲退影響，相信問題已經出現咗兩、三年，懷疑同路政署欠缺巡查維修有關。專家仲警告，如果唔盡快補救，再過兩、三年恐怕會危及結構穩固性。
你估路政署又有乜嘢回應吖嗱？其實都唔使點估，官老爺例牌打死都唔肯認錯，求求其其睇咗幾睇就話「結構穩固、無損安全」。之不過咁，死撐還死撐，署方偷偷派人修補橋躉幾個大窿。
唉，唔好怪功夫茶危言聳聽，睇番土瓜灣馬頭圍道冧樓事件吖，事發前夠有官老爺話過冇事啦，卒之冧到砰砰磅磅滿目瘡痍。大家又睇睇一連串嘅冧樹事件吖，嗰班官老爺好巴閉㗎，呢頭話完驗過冇事，嗰頭即刻冧畀你睇，十足十病態賭徒至愛嘅「指路明燈」。有一句潮語係咁講嘅，信佢一成，雙目失明。
好嘞，既然沙田石門交匯處有一條橋甩皮甩骨，東區走廊橋躉又移位，再加上路政署實牙實齒話結構穩固，到底會唔會出現死人冧橋慘劇？咁講啦，港產官僚好得意㗎，人哋就居安思危，佢哋就居危思安，對於危險到極嘅情況永遠自欺欺人，大家真係要打醒十二分精神小心又死人冧橋！