政情：李家仁Sing途唔怕蝕底
家庭醫生李家仁主唱《小明上廣州》，一度成為網上熱爆短片，佢尋日以主禮嘉賓身份出席香港教育學院第一屆教院青年節，表現「出位」，佢上台時不但搶咗學生主持手上嘅「貓紙」，叫學生放膽挑戰自己，更即席獻唱《小明上廣州》，以此形容自己嘅歌唱事業艱難，但全靠「唔怕蝕底」嘅精神，先可以開拓更多渠道去接觸歌唱事業。
李醫生尋日出席教院活動時話，好認同教院學生搞嘅「身無分文，探索社區」活動，因為自己曾經感同身受，「以前食雲吞，原本兩毫子加咗一毫子價，試過無錢畀」。佢鼓勵大學生勇於夢想，發展多方面。佢形容自己嘅歌唱事業艱難，但好彩「唔怕蝕底」，周圍為不同嘅機構做顧問，開拓更多渠道，終於透過呢啲渠道發展到自己嘅歌唱事業。
李醫生又話，做人除咗要有夢想之外，亦要練習勇氣，好似佢咁，以前成日參加朗誦比賽，所以令自己更有自信。日子有功，佢唱歌出碟，無勇氣都做唔成喇。