政情：長毛契女示威唔怯場
警方前晚出動胡椒噴霧鎮壓八十後，連八歲小童都被殃及。呢單警民大衝突前六個鐘頭，社民連同警方亦喺政府總部發生推撞，情況混亂，記者發現，喺雙方沓雜慌亂嘅人腳之間，竟然有一個樣子勁精靈嘅小女孩，坐喺地下悠然自得摺紙花。邊家女孩咁勁，可以臨危不亂？睇真啲，原來係長毛梁國雄嘅混血兒契女。
社民連要喺政府總部栽種茉莉花，最後遭警方以人鏈圍堵，兩方對峙，氣氛繃緊，但長毛契女可能見慣大場面，喺佢眼中，呢啲小衝突簡直濕濕碎，索性坐喺政府總部嘅紫檀樹旁嘅地下玩摺紙，悠然自得，天真爛漫，同現場大戰一觸即發嘅緊張氣氛形成強烈對比。小女孩對住咁激嘅示威場面，毫不怯場，好似天生食呢行飯，血液流着擅搞遊行示威嘅基因咁，唔知仲以為係長毛親生女呀！
長毛話，契女係由媽咪帶嚟遊行，因為趕住返屋企做功課，夜晚六點前離開政府總部，巧合避過入夜後警民衝突一幕。