政情：KK轟港府發展社企政策短視
民協近年花咗唔少時間搞社企，奈何生意難做，唔少更蝕本收場。為爭取政府支持，該黨議員馮檢基（KK）尋日專誠邀請民政事務局副局長許曉暉（Florence）到「民社中心」社企咖啡店「試菜」，更搬出鎮店之寶「刻骨銘心」咖啡，令已經搣甩咖啡癮嘅Florence都為之破戒，究竟呢杯咖啡有乜咁巴閉？
許曉暉「獻計」
呢杯名為「刻骨銘心」嘅咖啡係由兩杯espresso、一杯奶同兩片杏仁餅組成，畀大家一次過嘗盡苦、甘、香、甜四種味道，KK更笑言呢款咖啡有如「追女四部曲」。Florence雖然聲言自己「飲兩啖咖啡已瞓唔着」，但「美啡當前」亦難以抗拒，飲完仲大讚咖啡既香且醇，勢要叫多啲同事嚟幫襯喎。商界出身嘅Florence仲向KK「獻計」，建議佢哋將咖啡店嘅招牌同員工制服由深紅色轉為青綠色，等佢哋可以更搶眼。
雖然咖啡店口碑唔錯，但開業近八個月，至今仍未回本，每月更要蝕成幾萬蚊。KK尋日就批評港府雖喺財政預算案撥出逾億元助社企發展，但卻一直冇長遠又整體嘅政策，希望港府唔好淨係識用錢塞住人把口，加多幾分力度助社企發展喎。