政情：議員睇死鬍鬚曾無力遏樓市
預算案激起滔天民怨，其中一個敗筆，就係被政黨狠批無落重藥壓抑樓價。其實，政黨鬧還鬧，以鬍鬚曾嘅斑斑劣迹，邊有議員真心相信佢可以壓抑樓價吖？專業會議梁美芬同保險界陳健波就喺預算案出台前，分別斥資入貨，前者增持一個九龍西物業，後者更加喺南區海怡半島買入兩個相連單位，二人無懼後市下滑，仲唔係睇死鬍鬚曾江郎才盡，對遏阻樓價束手無策！
梁美芬係直選富婆，○八年進身立法會時，已申報共有六個物業，遍布西半山、九龍西同新界西，最近一次交易，係○九年初出售其中一個單位，主因當時金融海嘯爆發，所以減持套現。事過境遷，根據立法會秘書處紀錄，梁美芬今年一月再度出手，透過公司名義掃入多一個物業，今次睇好高鐵港段總站位置嘅九龍西，令手頭物業版圖回復至高峰期嘅六個。
梁美芬陳健波快狠準
另一個視鬍鬚曾額外印花稅如無物嘅，係立法會議員陳健波。波哥家住南區豪宅貝沙灣，一月份擴充旗下物業版圖，購入海怡半島高層兩伙相連單位，打算先放租後自用。波哥強調，自己唔係炒家，新單位作長遠投資用途，日後留畀家人自住，因為難得搵到向海、向南兼位處高層嘅相連單位，所謂千金難買心頭好，於是扑錘買入。
呢兩年樓價脫韁狂升，閒來玩劍、練拳自娛嘅鬍鬚曾，曾誇口出招要快、狠、準，不過，回顧佢嘅多次壓抑樓市措施，果然同佢玩西洋劍、耍拳腳功夫係同一套路，全屬花拳繡腿，有姿勢，無實際，變相愈係出招，愈壯大炒家個膽，樓價亦愈嚟愈瘋狂，芬姐同波哥喺預算案前買樓，正係對鬍鬚曾壓抑樓價無方嘅最大諷刺，佢哋一係睇穿預算案唔會再對樓市落重藥，一係睇死鬍鬚曾黔驢技窮，就算出招都唔慌有料到。連建制派都對鬍鬚曾無信心，睇嚟佢就算厚顏唔辭職落台，餘下任期都難有作為。
值得一提嘅係，芬姐同波哥不約而同喺同一個月份入貨，應非巧合。鬍鬚曾上年十一月中旬公布額外印花稅措施，樓市的確一度下跌一成至一成半，但僅維持咗兩個月，今年二月農曆新年之後又迅速反彈，仲火旺過以前。芬姐同波哥當機立斷喺一月出手，當時樓價正值跌軌，執到平貨，嗱，呢啲就真係出手快、狠、準嘞！