中環出更：羅寶文倡公園設貓狗專區
名人圈有唔少愛狗之人，富豪集團太子女羅寶文（Poman）係熱心代表，近日發起一班名人為貓狗謀福利，搞咗個「救救狗狗慈善步行日」，尋日舉行記者會，Poman帶埋六歲大愛犬Aimee亮相，更自發收集咗二萬個市民簽名，要求政府喺公園撥出貓狗專區，等佢哋呼吸吓大自然新鮮空氣。Poman一收工就拖晒八隻愛犬散步，日子有功，難怪身形fit到極。
擬收集十萬狗主簽名
身為慈善步行活動大使嘅Poman，家中養有八隻貴婦狗，當正佢哋係仔女咁看待，Aimee尋日陪主人出席event，相當得寵。
愛之深，睇見狗狗受苦都心酸，Poman話，最渴望帶狗狗行公園散步，可惜受政府條例監管，狗狗被拒諸門外，佢多番向政府官員反映，仍不得要領。靈機一觸集合眾狗主力量，打算收集十萬個熱心狗主簽名，提出訴求，Poman手上已經有二萬個簽名嘞。