中環出更：黃傑龍自家燒肉饗好友
最低工資委員會新一屆成員開始做嘢，獲委任嘅商界代表敍福樓集團執行董事黃傑龍（Simon）更加忙到飛起。事關佢旗下餐廳開完一間又一間，加上公職多多，少啲精力都唔掂。早前卓妮見佢喺旗下日式燒肉餐廳牛角食午飯，座上仲有香港菁英會常務副主席洪為民（Witman），同埋扒王之王老細李德麟嘅囝囝李浩森（Alex），忙裏偷閒好自在。
Simon係敍福樓創辦人黃耀鏗嘅兒子，曾任路政署發言人，四年前進軍餐飲業之後，短時間就打響御苑皇宴嘅名號，成績唔錯。後來佢夥拍香港和民嘅創辦人廖傑民成立「株式會社」，旗下食肆品牌愈開愈多。夏麵館、鰲、牛涮鍋、正村壽司等都喺佢麾下。
搞食肆多瓣數
牛角係日本最大嘅燒肉連鎖店，喺日本有近七百間分店，Simon取得港澳代理權後，喺九龍灣同埋尖沙咀已經開咗兩間分店，訂位情況爆到七彩，午市同晚市訂位要排到四、五個月後，認真誇張。
Witman係Simon相識十五年嘅老友，兩人結緣於交通安全隊，現時Witman係香港交通安全隊副總監，Simon係東九龍總區指揮官。至於啱啱讀完書返港嘅「扒王仔」Alex，依家負責市場推廣，遲啲打算去北京研習國情。
當日Simon推介好多美食招呼兄弟，包括鹽醬牛舌、上級牛肋肉等，肉質鮮美，仲有日本超人氣嘅辣油豆腐。Simon示範燒肉嘅秘訣，要一次過燒至七成熟至反面，唔好成日反轉塊肉，咁就可以鎖住肉汁。Witman同Alex翹埋雙手歎老細親自炮製嘅靚烤肉，食得不知幾開心。
卓妮