國之將亡，必有妖孽。香港地方細細，妖孽多多，呢，又有辦你睇喇！
有人喺討論區網站「香港高登討論區」持續發貼文誹謗東方報業集團及其高層成員，東方於○八及○九年兩度興訟，民事控告經營高登嘅兩間公司誹謗。高院原訟庭尋日裁定，三段涉案討論貼文全部屬於誹謗，高登要對其中一段負責，向東方報業集團旗下兩間公司賠償十萬元。今次係本港首宗涉及網上討論區言論嘅誹謗案例，證明邪不能勝正。不過咁，由於司法機構放生另外兩段貼文，東方正考慮係咪提出上訴。
功夫茶諗極都唔明，既然三段討論貼文全屬誹謗，點解淨係罰其中一段呢？法官話喎，被告只係涉案「次等分發人」，如能證實喺無知之下發布有關言論，就可免除責任。由於被告收到原告投訴後，已經喺短時間內刪除其中兩段貼文，已負起其「合理責任」，所以毋須負責，至於另一段貼文就拖咗八個幾月先至刪除，所以要負責。
咁都得？誹謗就係誹謗，早刪又好，遲刪又好，都必須受到懲罰，咁先至係㗎。正如學者話齋，言論自由係要保障，但言論必須有事實根據，唔可以憑空捏造，今次涉案言論明顯含惡意及虛構，網站喺所謂「合理」時間內刪除就可以免責，絕對唔合理。
係咯，任何人主持網上平台，就有責任去打理同監管，話唔知情係呃人嘅，以唔知情作為擋箭牌更加係九唔搭八。以今次東方獲判勝訴嘅個案嚟講，雖然東方早已去信要求被告刪除有關誹謗言論，但對方居然闊佬懶理，拖咗八個幾月先至肯刪，對東方造成嘅傷害難以估計，事實證明，被告完全罔顧被誹謗者嘅利益。你話喇，咁嚴重嘅誹謗罪只係罰款十萬元，係咪姿勢大於實際吖？係咪放生吖？
律師黃國桐就講得啱嘞，為咗保障市民嘅言論自由及被誹謗言論傷害嘅人士，法庭處理該類案件時應加重刑罰，咁至有阻嚇作用吖嘛。
其實喺外國，網站經營者為網民嘅誹謗言論負上刑責，早就有例可援，香港網站之所以無王管，就係因當局監管不力，執法不嚴，加上司法放縱，先至會烏煙瘴氣。今時今日，網絡無遠弗屆，幾小時甚至幾分鐘嘅流傳已影響深遠，例如最近北非及中東國家爆發嘅茉莉花革命，就係通過網絡迅速傳播，結果搞到呢啲國家嘅統治者好似骨牌咁，冧完一個又一個。正所謂，自作孽不可活，網上誹謗，固然罪無可恕，但監管不力，執法不嚴，港府更加難辭其咎，如果繼續懶懶閒，香港遲早爆發另一場茉莉花革命㗎咋。
講開又講，香港話就話係法治社會，其實係掛羊頭賣狗肉，市民嘅利益根本得唔到保障。你被侵權咩，你被誹謗咩，當局一於詐傻扮懵，袖手旁觀。好似東方咁吖，次次都要自己入稟討回公道，今次雖然獲判勝訴，但淨係律師費就使咗二百萬元，相對於被告賠償區區十萬元，完全不成比例。唉，喺香港，討回公道嘅成本有幾重，大家有眼見喇！
「金猴奮起千鈞棒，玉宇澄清萬里埃。」計功夫茶話齋，香港可能真係要請出孫大聖，先至有運行。