政府庫房水浸，鬍鬚曾份「冇乜可以改」嘅預算案激起全民聲討，下月六日多個團體將舉行反財政預算案遊行，鬍鬚曾死撐甚麼「注資六千元入強積金是好多市民要求」將不攻自破。市民明明叫他派現金，他卻來來去去都係嗰句「驚通脹」！
驚乜鬼啊！鬍鬚曾一味吹水又話供應幾多地皮起幾多樓，嗰頭就畀另一「好打得高官」踢爆，你話有四萬單位，實情最多二萬；你出咗咁多招遏樓市，樓價一樣咁飆升，你驚乜通脹？你已去到「人不要臉鬼都怕」的至高地步，閉門造車，又話市民要求，咁都得，難怪俗話說：面皮厚厚，吃個夠夠。
有議員質疑他答乜都係「為了抗通脹」，好似錄音機；老朽忽地諗起明人莊元臣在《叔苴子》講咗個寓言，謂八哥鳥經過調教會模仿人的聲音，翻來覆去叫幾句現成話。一趟，蟬在庭前高歌，八哥笑牠發不出人的聲音。蟬說：「你能學人話當然好，但這是你自己的話麼？我唱的可是我自己的歌呀！」八哥聽後覺得慚愧，從此不再一開口就照本宣科了。
貴為司長嘅鬍鬚曾，難道真係不如一隻八哥？八哥尚懂「知恥近乎勇」，而鬍鬚曾果真講慣鬼話，就可以把無恥進行到底？
鬍鬚曾，咪咁花崗岩頭腦，再不退稅同中產有仇，再扮盲俠話已照顧Ｎ無人士，再死撐抗通脹要注資六千元入強積金，再講鬼話有足夠單位可令樓市降溫，再吹噓份垃圾預算案冇修訂空間，如此剛愎自用，勇往直前，只能等待結果——車毀人亡！鬍鬚曾，你的腦縱使煉成金鐘罩，可市民的怒吼會穿透你的死穴！