政情:建制派夾擊促鬍鬚曾回水

財政司司長鬍鬚曾炮製嘅史上最廢預算案引起全城怒吼,不但泛民主派迅速聯手舉辦連串遊行反預算案,連建制派尋日亦緊急開會密謀作反,暫定下周初拉隊約見鬍鬚曾,要求佢讓步回水。自由黨主席劉健儀表明,如果預算案原封不動,佢哋好難支持。工聯會黃國健就警告,喺民意面前鬍鬚曾冇得強硬。早前講明支持預算案嘅民建聯,亦改口話預算案有修改空間。泛民建制罕有口徑一致,一場憲制危機一觸即發,鬍鬚曾想唔跪低認衰都幾難。