史上最廢預算案惡評如潮，社民連立法會議員梁國雄（長毛）多次向財政司司長曾俊華（鬍鬚曾）掟苦瓜、白果洩憤。點知政務司司長唐英年尋日寫信畀立法會主席，話最近會議廳發生嘅事已經去到「不能容忍的地步」，仲公開挑戰立法會，話如果佢哋唔處理，當局會轉畀「相關部門」處理，暗示會搵警察去立法會踩場。不過，最後碰壁收場。
唐唐雖然尋日係第一次出信畀立法會主席投訴，但今次語氣最強硬，不過睇嚟冇人領情。立法會主席回覆話，現行《議事規則》未能就議員多次作出不檢點行為採取任何進一步行動，但對唐唐話要轉交相關部門一事就不予置評，強調議員享有《基本法》、《立法會（權力及特權）條例》所訂嘅特權添。
根據現行嘅規定，即使再有官員被掟嘢，都唔係報警就可以搵警察幫手，因為警方都要立法會主席批准先可以入內執法。
民主黨主席兼議事規則委員會委員何俊仁就話，預算案廢到咁，民怨民憤去到頂點，相信議會內冇乜人有心情傾掟嘢嘅問題，唔希望政府用呢啲招數去轉移市民視線喎！