政情：IQ博士話退唔退？
中總立法會代表「IQ博士」黃宜弘○八年連任後表明，完成今屆會期將退下火線，中總亦開始物色接班人。
近期表現有心有力
不過，立法會商會議席每次輪替，總難無風無浪，中總內部有消息傳出，IQ博士最近突然轉趨活躍，多咗參與會務，以前唔出席嘅會議，依家都有現身，仲好積極出主意。IQ博士表現得咁「有心有力」，唔似準備退休，難怪有人覺得佢想喺立法會「坐多一屆」。
自IQ博士表明打算引退後，至少有兩名會內有實力人士表態願意接棒，一個係副會長、協成行董事總經理方文雄，一個係常董、有「新金王」稱號嘅黃英豪，而中總高層亦早已開始着手交棒部署，一旦七十二歲嘅IQ博士真係回心轉意想競逐連任，一場內部「協調」勢所難免。
我哋尋日嘗試與IQ博士聯絡，但至截稿前仍未收到佢嘅回覆。其實選舉協調，總會傷和氣，且看中總會長蔡冠深如何擺平！