政情：毓民長毛玩殘張建宗
立法會財務委員會尋日審議新交通津貼計劃，勞工及福利局上星期已急急讓步想快刀斬亂麻搞掂佢，點知議程拖到尋日至傾，張建宗結果都係畀社民連分裂兩派玩到殘，先係黃毓民叫佢「狗官」，跟住又有長毛梁國雄整隻狗公仔同狗屋出嚟揶揄佢係「狗官」，佢哋鬥玩嘢搶風頭，張建宗惟有採取忍字訣應付。
鬧完「狗官」送狗屋
泛民議員喺尋日會議上一致喊打，連日喺議事堂花招多多嘅社民連同人民力量繼續較勁，離開社民連組織人民力量嘅黃毓民率先發功，狠批張建宗刻薄，連六百蚊嘅交通津貼都抓到實，仲質問張建宗一個月幾多人工。張建宗一度以人工屬公開資料唔想答，最後都無奈答咗句：「二十八萬。」話音未落，會議廳已一陣沸騰。
毓民跟住狠批佢坐享高薪，不知民間疾苦：「我依家鬧你狗官……」，跟住仲挑釁話：「你唔叫主席裁決？」張建宗面色一沉唔接波。冇幾耐社民連嘅長毛又接棒，佢抬出一間紙製狗屋，裏面放咗隻狗公仔，上面貼咗張建宗張相，長毛話：「我今次唔會掟你，你匿響間屋入面閂咗門，根本睇唔到基層。」張建宗一再被揶揄，面露不悅神色，卻冇搵主席裁決，以免再橫生枝節，但求快快表決。睇嚟張建宗嘅忍功都唔錯。