政情：名人及時買車避過稅魔
財政預算案建議大幅增加私家車首次登記稅，除咗汽車業界叫苦連天，更有買咗新車未交收嘅人無辜破財，大家都估唔到財爺會加車稅咁騎呢。不過，亦有唔少政商界名人好幸運逃過稅魔狙擊，慳得最多稅嘅就係玩具大王蔡志明囝囝蔡加讚（Karson），去年底購入嘅新Benz跑車幫佢足足慳咗廿五萬元，而立法會議員「金勞詹」詹培忠及新民黨主席葉劉淑儀亦好彩慳番一筆。
Karson去年初用自己賺得嘅錢，買咗架六百一十萬元嘅Lamborghini（林寶堅尼）Murcielago SuperVeloce跑車後，下半年又以三百五十二萬元買咗部白色Mercedes-Benz（平治）SLS AMG coupe跑車。部Benz跑車嘅首次登記稅為一百六十七萬元，但如果以預算案建議嘅新稅率計算，就要繳付近一百九十三萬元，所以Karson足足慳咗廿五萬五千元。
至於我哋早前介紹過金勞詹新買嘅四十萬元金色豐田Vellfire豪華七人車，舊稅率下嘅首次登記稅只係十三萬三千多元，但新稅率就要十五萬三千多元，令佢慳番二萬元稅款。葉劉淑儀去年底都出咗部白色豐田Vellfire Platinum豪華七人車，車價連稅要三十八萬元，但新稅率下就接近四十萬元，幫佢慳咗一萬八千元稅款，足夠買多套名牌靚衫。
黃英豪等交收老友破財
慳到稅固然開心，但唔係個個都咁幸運。好似經濟動力林健鋒就買咗部百多萬元嘅新Benz S-Class房車，可惜要下月才交收，結果硬食多一筆稅，心情梗係唔多靚啦。此外，買咗新車未交收嘅仲有「五散人」會計界議員陳茂波，都係無端端破財。
不過，林健鋒同陳茂波嘅心情相信都唔及金至尊主席黃英豪咁忐忑，事關黃英豪旗下公司兩個月前訂咗部價值五百多萬元嘅賓利（Bentley）豪華房車，用嚟載客，但因為車行要執靚部車才能交收，累佢畀多幾十萬元稅。黃英豪話，車行負責人係佢好朋友，願意幫佢啃咗筆額外稅款，但叫得做老友，佢都覺得唔好意思喎！真係有人歡喜有人愁，總之多得鬍鬚曾唔少喇！