中環出更：白富鴻帶隊率菁英會訪京
匯聚青年才俊嘅菁英會前晚首次搞春茗，喺豪宅凱旋門Club House筵開幾圍。「菁英會」主席白富鴻、常務副主席洪為民（Witman）、副主席霍啟剛、莊家彬（Albert）都齊齊現身主持大局，「菁英」女將就有王文博、莊家蕙、傅明憲、邱詠筠、邱詠麒、周沁等，場面同樣熱鬧。
今次春茗由第十期國情研習班嘅同學仔做搞手，牽頭嘅係康業信貸快遞行政總裁李根泰，佢連妹妹李鈺涵都拉埋嚟做司儀。佢話新年場地難求，選擇凱旋門，貪佢啱擺幾圍，又可以走出宴會廳望住海景傾吓偈，希望吸引多啲同學仔參加。
菁英會兄弟姊妹咁團結，白富鴻四月下旬將帶隊首次訪京，拜訪全國青聯、港澳辦、統戰部及舉辦國情研習班嘅國家行政學院。「80後」等青年問題已擺上議程，中央都好關注，未知主管港澳事務嘅國家副主席習近平，屆時會否親自接見？
啟剛不談婚期
啟剛同家蕙嘅哥哥Albert姍姍來遲，原來兩人啱啱出席完番禺市政協新春酒會，匆匆由內地趕嚟。講起早前佢二叔霍震寰話霍家今年有喜事，啟剛話，霍家今年確實有喜事，因為佢表哥蔡偉基上星期啱啱結婚。
咁佢今年係咪同跳水公主郭晶晶結婚呢？啟剛都係嗰句，我唔答呢個問題，繼續賣關子。