中環出更：青聯兄弟姊妹春茗開P好墟冚
大興紡織廠創辦人陳鉅元囝囝陳仲尼（Rock）與新世界集團主席鄭裕彤長孫鄭志剛（Adrian）去年出任全國青聯副主席後，本周一出錢出力，主持上任後首個新春聯歡晚宴，筵開逾三十圍，與全國及各省市青聯成員濟濟一堂，好多名人二代都難得露面，場面好墟冚。
阿Rock與Adrian身為籌委會主席，負責在場打點。已退下火線嘅前全國青聯副主席霍震寰、容永祺、黃英豪、龍子明都嚟坐鎮，黃英豪帶埋囡囡嚟。
陳仲尼鄭志剛揼心口
好多入咗青聯嘅富二代都有現身撐場，好似合和實業董事總經理胡文新、會德豐地產（香港）副主席吳宗權、百仁基金主席施榮忻、深圳觀瀾湖球會副主席朱鼎健（Ken）、廖創興後人廖偉麟、大新銀行主席王守業大仔王祖興、英皇集團主席楊受成細仔楊政龍、趙世曾長子趙式浩、敍福樓集團執行董事黃傑龍等，總之城中嘅富二代都差不多嚟咗一大半。
阿Rock與Adrian拍住財神即場派利是，利是入面係一個朱古力金幣，意頭十足。為搞氣氛，阿Rock帶頭捐出一萬元銀行禮券抽獎，Adrian就捐一萬元其家族旗下嘅周大福珠寶金行現金禮券，其他兄弟姐妹都贊助唔少禮物，獎品豐富。
胡文新本來抽中一部16GB iPad，點知佢中途有事走先，最後由廖偉麟冷手執個熱煎堆，捧走部iPad。趙式浩就抽中一部Samsung Galaxy，興奮到極。
晚宴高潮，要數啤酒競飲比賽。全國青聯常委吳傑莊聯同兄弟組團參賽，上台一刻，佢高舉勝利手勢，戰意高昂，可惜不敵對手。
輸咗酒量，吳傑莊心情依然係咁靚，精於I.T.科技嘅佢，啱啱搞網上生意「淘至尊」，下周正式開張。「淘至尊」走嘅係高級路線，喺網上賣金銀珠寶、貴價旅行團、紅酒，又請來逾百明星喺網上賣二手衫，仲可以預訂演唱會飛，聽落幾有噱頭。
卓妮