財政司司長曾俊華尋日喺新一份財政預算案建議，長者醫療券資助金額由原來每年每人二百五十蚊加到五百蚊，啱啱翻一番。港府會撥十億元將醫療券試驗計劃延長三年，但係就拒絕將受惠年齡由七十歲降至六十五歲。
恭喜！恭喜！公公婆婆望到頸都長，終於可以免費剝隻牙咯！長者醫療券金額大幅提高，以前得雞碎咁多，買鹽唔鹹，買糖唔甜，莫講話睇病，就算剝牙至多只夠剝半隻。結果冇乜人捧場，參與率只得四成半。呢次金額加碼，勉強夠剝隻牙。對老人家嚟講，資助杯水車薪肯定唔夠，不過係聊勝於無。
呢，聽吓一位八十歲老婆婆點睇，見一次醫生要使百七蚊，五舊水睇三次私家醫生已經要倒貼，佢要求長者醫療券金額每年至少一千蚊；有位六十八歲老伯話，自己周身病痛，但未到七十歲唔夠資格受惠。當局唔肯降低受惠長者年齡限制，被關注團體狂轟唔湯唔水。
查實，預算案喺醫療服務方面落墨唔多，而且措施基本上濕濕碎碎，對改善早就百病纏身嘅公共醫療系統毫無幫助。但鬍鬚曾死性不改又吹水，「承諾」醫療開支新年度將增加到佔政府經常開支嘅百分之十六點五，二○一一至一二年度醫療開支係三百九十九億元，比上年度增加三十幾億。
聽落好似好大手筆，其實鬍鬚曾根本喺度玩數字遊戲，唔識嘅畀佢嚇死，識嘅畀佢笑死。對醫療服務嘅投入，多數政府都根據喺ＧＤＰ所佔比例計算，但港府零零舍舍按佔政府經常開支比例計。唔係標奇立異，入面有蠱惑o架！
講起來真丟架，咪睇香港位列全球十大最富裕地區之一，庫房水浸，原來公營醫療開支只佔ＧＤＰ不足百分之三，係其他發達地區相關比例嘅三分一。同美國比更不得了，人哋醫療開支比例佔ＧＤＰ百分之十六，簡直係蚊髀同牛髀。
條數實在太難睇，港府惟有博大霧，用佔政府經常開支比例諗住蒙混過關。講真，就算呢次將醫療開支加多少少，有排都追唔上人哋。不如正視現實，增加投入，做多啲實際嘢好過喇。
係人都知，近年公共醫療系統七國咁亂，完全係港府冇承擔、投放跟唔上需求、資源錯配種落嘅惡果。遠嘅唔講，就講近排轟動全城嘅屯門醫院一年內四分之一內科醫生劈炮「大逃亡」事件，正正係醫管局長期以來唔正視人手不足問題而引起。
呢，前日屯門醫院就有幾十位內科醫生集會，抗議醫管局高層不仁，只顧發展，罔顧前線死活，變相危害病人生命。十個茶壺得番六個蓋，醫生做到氣咳，愈辛苦愈多人唔撈，病人輪候時間就愈長，形成惡性循環，咁搞法，醫療服務質素點會好吖！
計功夫茶話齋，長者醫療券只能治標，大幅度增加對公共醫療嘅投入至可以治本。不過有一個前提，就係先要改革目前嘅公共醫療架構，如果唔改變資源分配不公、肥上瘦下嘅畸形現狀，揼再多錢都止唔到咳，只會製造新問題，遲早爆大鑊。