勞工及福利局局長張建宗幾經辛苦兩次「跪低」讓步，才湊夠立法會過半數議員支持新交通津貼計劃，但因議員討論其他撥款超時，要押後到本周五再戰。不過熟悉會議程序嘅人話，本周五財委會仲要傾埋一項涉及九億二千多萬元嘅港鐵南港島線工程撥款，再傾新交津，前者雖然未超支，但估計唔少港島區議員會就工程走線、造價同污染問題發言，隨時傾多兩粒鐘才完成表決，當日會議又冇咁一半。
表決完南港島線，仲要處理埋職工盟李卓人提出嘅終止辯論新交津撥款動議，雖然明知唔夠票通過，但到時一人一句各噏幾分鐘，投埋票可能又要玩番個幾鐘，剩低唔夠一粒鐘傾真正嘅撥款申請內容，九成九唔夠時間完成表決，仲未計臨時加插嘅議程，財委會隨時又要押後。
最慘係下周三立法會大會有多項重量級議案，包括停車熄匙同政改本地立法，最壞情況要連傾五日玩到星期日，冇可能再加開財委會傾新交津，意味着新交津一旦無法喺聽日順利表決通過，隨時要押後到三月中下旬至搞掂。