政情：癡呆症命名 仲未傾掂數
「老人癡呆症」命名又鬧風波。自從諾貝爾物理學獎得主、光纖之父高錕證實患上老人癡呆症後，大眾對呢個病關注咗，賽馬會耆智園亦發起正名比賽，希望搵一個新名取代癡呆症，務求更準確、更直接將病徵反映出嚟，最後選出「腦退化症」去取代，當時除咗獲得政府支持，連高錕太太高黃美芸都讚改得好。
不過正名事件峰迴路轉，政府突然轉軚，食物及衞生局局長周一嶽尋日以書面回覆立法會議員提問時話，癡呆症其實有好多種，各有成因及徵狀，腦退化唔係唯一成因，不足以反映呢個病嘅徵狀，講明醫管局、衞生署無計劃用呢個新名，態度一百八十度轉變。
九個老人及醫學團體代表呢個月仲開咗次會，認同正名比賽有助消除大眾對老人癡呆症嘅歧視，但都認為呢個病有其他徵狀。既然不能取得共識，佢哋稍後會再成立工作小組，搜集各方意見。原來搞咗咁耐，高錕究竟患咩病，大家都未有統一說法，睇嚟高黃美芸都係專心照料丈夫嘅病情好過。